افغان وزارتِ خارجہ کے ڈائریکٹر حافظ ضیا احمد نے سوشل میڈیا پلیٹ فارم ایکس پر اپنے بیان میں کہا کہ اسحاق ڈار کا دعویٰ ’’غلط اور غیر حقیقی‘‘ ہے۔

اُن کا کہنا تھا کہ  دونوں ممالک کے وزرائے خارجہ کے درمیان رابطہ باہمی افہام و تفہیم کے تحت ہوا تھا۔

انہوں نے کہا کہ ریاستوں کے تعلقات کی بنیاد باہمی احترام اور درست حقائق پر ہونی چاہیے، ایسے بیانات سفارتی آداب اور دو طرفہ احترام کے منافی ہیں۔

افغان عہدیدار نے مزید کہا کہ امارتِ اسلامیہ ہمیشہ سے اپنے پڑوسی ممالک کے ساتھ احترام، تعاون اور مثبت تعلقات کے فروغ کی خواہاں رہی ہے، لہٰذا پاکستانی حکام کو چاہیے کہ اپنے سرکاری بیانات میں حقائق کو درست طور پر پیش کریں۔

یاد رہے کہ منگل کے روز ایوانِ بالا سے خطاب کرتے ہوئے اسحاق ڈار نے کہا تھا کہ افغان وزیرِ خارجہ امیر متقی نے انہیں چھ مرتبہ فون کیا اور انہوں نے صرف یہی کہا کہ ہمیں آپ سے صرف ایک چیز چاہیے کہ آپ کی سرزمین ہمارے خلاف استعمال نہ ہو۔