آصف علی زرداری کی زیر صدارت معیشت، توانائی اور علاقائی صورتِ حال پر ایک اہم مشاورتی اجلاس منعقد ہوا، جس میں شہباز شریف، نائب وزیرِاعظم، چاروں وزرائے اعلیٰ، وزیر دفاع خواجہ آصف، وزیر خزانہ محمد اورنگزیب اور وزیر داخلہ محسن نقوی نے شرکت کی۔

اجلاس میں ملکی معیشت، توانائی اور خطے کی مجموعی صورتِ حال کا تفصیلی جائزہ لیا گیا، جب کہ تیل و گیس کے دباؤ اور توانائی کی لاگت پر قابو پانے کے اقدامات پر غور کیا گیا۔

اعلامیے کے مطابق اجلاس میں عوام کے لیے اشیائے ضروریہ کی دستیابی یقینی بنانے پر بریفنگ دی گئی اور مہنگائی کے بوجھ میں کمی کے لیے تمام ممکنہ اقدامات یقینی بنانے کی ہدایت کی گئی۔

نائب وزیرِاعظم اسحاق ڈار نے عالمی سفارتی روابط پر بریفنگ دیتے ہوئے ترکیہ، سعودی عرب اور مصر کی قیادت سے ہونے والے روابط سے اجلاس کو آگاہ کیا۔

اجلاس میں یہ بھی فیصلہ کیا گیا کہ بچت اقدامات سے حاصل ہونے والے فنڈز عوامی ریلیف پر خرچ کیے جائیں گے۔

اعلامیے کے مطابق حکومت نے اخراجات میں کمی کی ہے اور ترقیاتی بجٹ میں کٹوتی کی گئی ہے، جبکہ وزیراعظم نے تیل کی قیمتوں میں اضافے کی تجاویز متعدد بار مسترد کی ہیں۔

علاوہ ازیں عوام کو ایندھن کی بچت اور پبلک ٹرانسپورٹ کے استعمال کی ترغیب دینے کی بھی ہدایت کی گئی ہے۔