سرکاری خبر رساں ایجنسی اے پی پی کے مطابق وزیراعظم نے یہ بات اسلام آباد کیپٹل ٹریفک پولیس کو ایکو اسمارٹ الیکٹرک گاڑیاں فراہم کرنے کی تقریب سے خطاب کرتے ہوئے کہی۔

انہوں نے کہا کہ توانائی کی بچت سے متعلق ایسے اقدامات کو تمام قانون نافذ کرنے والے اداروں اور صوبوں میں بھی اپنایا جانا چاہیے۔

وزیراعظم نے بتایا کہ وزارتِ داخلہ کی جانب سے مجموعی طور پر 15 الیکٹرک گاڑیاں فراہم کی گئی ہیں، جو پیٹرول اور ڈیزل کے بغیر بیٹری پر چلتی ہیں، جب کہ گاڑیوں کی ایک اور کھیپ بھی جلد شامل کی جائے گی۔

انہوں نے اس اقدام کو اہم قرار دیتے ہوئے کہا کہ اس سے ملک کے غیر ملکی زرِ مبادلہ کے ذخائر پر مثبت اثرات مرتب ہوں گے۔

اے پی پی کے مطابق ایکو اسمارٹ الیکٹرک گاڑیوں کی فراہمی حکومت کی توانائی بچت پالیسی کا حصہ ہے۔

رپورٹ میں مزید کہا گیا ہے کہ فیول اکانومی اور الیکٹرک گاڑیوں سے متعلق پالیسی پر کام موجودہ علاقائی بحرانوں سے قبل ہی شروع کر دیا گیا تھا، جس کے تحت گاڑیوں کی خریداری کا عمل بھی پہلے ہی آغاز پا چکا تھا۔