تفصیلات کے مطابق مناواں بی ایم سی اسٹاپ کے قریب ایک بچہ کھلے مین ہول میں گر گیا، جس کی سی سی ٹی وی فوٹیج منظرِ عام پر آ گئی ہے۔ فوٹیج میں معصوم بچے کو مین ہول میں گرتے ہوئے واضح طور پر دیکھا جا سکتا ہے، جس کے بعد علاقے میں خوف و ہراس پھیل گیا۔

سی سی ٹی وی فوٹیج میں دیکھا جا سکتا ہے کہ واقعے کے فوراً بعد سڑک سے گزرنے والے ایک شہری نے بچے کو باہر نکالنے کی کوشش کی، اسی دوران ایک اور شہری بھی موقع پر پہنچ گیا اور دونوں نے مل کر بچے کو بحفاظت مین ہول سے باہر نکال لیا۔

خیال رہے کہ چند روز قبل لاہور میں بھاٹی گیٹ کے قریب ایک خاتون اور ان کی بیٹی کھلے مین ہول میں گر کر جاں بحق ہو گئی تھیں، جس کے بعد وزیراعلیٰ پنجاب مریم نواز نے واقعے کا نوٹس لیتے ہوئے تحقیقات کا حکم دیا تھا اور مستقبل میں ایسے واقعات سے بچاؤ کے لیے مؤثر اقدامات کی ہدایت کی تھی۔

ذرائع کے مطابق مذکورہ واقعے کے حوالے سے کارروائی کی گئی ہے اور پانچ افراد کو گرفتار کر لیا گیا ہے۔