ذرائع کے مطابق واقعہ اس وقت پیش آیا جب متاثرہ شہری حارث نے علاقے میں قائم اسکریپ گودام کے خلاف کنٹونمنٹ بورڈ میں شکایت درج کروائی تھی۔ شکایت پر انتظامیہ نے کارروائی کرتے ہوئے گودام بند کرادیے تھے، جس پر گودام مالکان اور ان کے ساتھیوں نے مبینہ طور پر انتقاماً حارث کو پکڑ لیا۔

سوشل میڈیا پر وائرل ہونے والی ویڈیو میں دیکھا جا سکتا ہے کہ ملزمان نے شہری کو رسیوں سے باندھ کر پائپوں، ڈنڈوں، لاتوں اور مکوں سے تشدد کا نشانہ بنایا۔ کچھ ملزمان کے ہاتھوں میں اسلحہ بھی دکھائی دیا۔

پولیس نے واقعے کا مقدمہ تھانہ سٹی میں درج کرلیا ہے۔ حکام کے مطابق ویڈیو فوٹیج کی مدد سے ملزمان کی شناخت کرلی گئی ہے، ایک ملزم کو گرفتار کرلیا گیا ہے، جب کہ دیگر کی گرفتاری کے لیے چھاپے مارے جارہے ہیں۔

پولیس ترجمان کا کہنا ہے کہ واقعے میں ملوث تمام ملزمان کو جلد قانون کے کٹہرے میں لایا جائے گا۔