کمپنی کے مطابق نیا ورژن جی پی ٹی-5.3 انسٹنٹ پہلے کے مقابلے میں زیادہ درست، کم دفاعی انداز کا حامل اور بہتر ویب معلومات فراہم کرنے کی صلاحیت رکھتا ہے۔
اوپن اے آئی کا کہنا ہے کہ ماضی میں ماڈل بعض اوقات ایسے سوالات کا جواب دینے سے بھی گریز کر لیتا تھا جن کا جواب محفوظ طریقے سے دیا جا سکتا تھا، یا پھر اصل جواب سے پہلے طویل حفاظتی وضاحتیں پیش کر دیتا تھا جس سے گفتگو کا بہاؤ متاثر ہوتا تھا۔
نئے اپڈیٹ میں ان مسائل کو کم کرنے کی کوشش کی گئی ہے تاکہ صارفین کو براہِ راست اور موزوں جواب فراہم کیا جا سکے۔
کمپنی کے مطابق جی پی ٹی 5.3 انسٹنٹ اب غیر ضروری احتیاطی جملوں اور طویل وضاحتوں سے گریز کرتے ہوئے زیادہ سادہ اور واضح انداز میں جواب دیتا ہے۔
یہ تبدیلی صارفین کی آراء کی بنیاد پر کی گئی، جن کا کہنا تھا کہ سابقہ ورژنز بعض اوقات حد سے زیادہ دفاعی یا اخلاقی لیکچر دینے والے محسوس ہوتے تھے۔
اوپن اے آئی کے مطابق نئے ماڈل میں انٹرنیٹ سے حاصل کردہ معلومات کے استعمال کا طریقہ بھی بہتر بنایا گیا ہے۔
اب ماڈل صرف لنکس دینے یا ویب نتائج کا خلاصہ پیش کرنے کے بجائے آن لائن معلومات کو اپنی داخلی سمجھ بوجھ کے ساتھ یکجا کر کے زیادہ جامع جواب فراہم کرتا ہے۔
کمپنی کا کہنا ہے کہ ماڈل اب سوال کے اصل مقصد کو بہتر انداز میں سمجھنے اور سب سے اہم معلومات کو نمایاں کرنے کی صلاحیت رکھتا ہے۔
اپڈیٹ کا ایک اہم پہلو لہجے میں بہتری بھی ہے۔ اوپن اے آئی کے مطابق پہلے کے ورژنز بعض اوقات حد سے زیادہ رسمی انداز اپناتے یا صارف کے جذبات کے بارے میں غیر ضروری مفروضے قائم کرتے تھے۔
جی پی ٹی 5.3 انسٹنٹ کو اس طرح ڈیزائن کیا گیا ہے کہ وہ زیادہ فطری، متوازن اور مسلسل اندازِ گفتگو اختیار کرے۔ صارفین بدستور سیٹنگز کے ذریعے جواب کے لہجے، گرمجوشی اور انداز کو اپنی پسند کے مطابق ایڈجسٹ کر سکتے ہیں۔
کمپنی نے یہ بھی دعویٰ کیا ہے کہ ماڈل کی حقائق بیان کرنے کی صلاحیت میں بھی بہتری آئی ہے۔ اوپن اے آئی کے مطابق داخلی جانچ کے دوران نئے ماڈل میں غلط معلومات (ہیلوسینیشن) کی شرح میں واضح کمی دیکھی گئی۔
مزید پڑھیں: ایپل نے آئی فون 17ای اور ایم 4 چپ سے لیس نیا آئی پیڈ ایئر متعارف کروا دیا
ویب معلومات استعمال کرتے ہوئے غلطیوں میں 26.8 فیصد کمی جب کہ صرف داخلی علم پر انحصار کی صورت میں 19.7 فیصد کمی ریکارڈ کی گئی۔ یہ ٹیسٹ طب، قانون اور مالیات جیسے حساس شعبوں میں کیے گئے۔
کمپنی کا کہنا ہے کہ جی پی ٹی 5.3 انسٹنٹ بطور تحریری معاون بھی زیادہ مؤثر ہے۔ یہ نہ صرف عملی کاموں میں مدد فراہم کرتا ہے بلکہ تخلیقی تحریر، کہانی نویسی، متن کی تدوین اور خیالات کو وسعت دینے میں بھی بہتر کارکردگی دکھاتا ہے، جب کہ جواب کو واضح اور منظم رکھتا ہے۔
اوپن اے آئی کے مطابق جی پی ٹی 5.3 انسٹنٹ آج سے تمام چیٹ جی پی ٹی صارفین کے لیے دستیاب ہے۔ ڈویلپرز اسے کمپنی کے اے پی آئی کے ذریعے جی پی ٹی-5.3-چیٹ-لیٹیسٹ کے نام سے استعمال کر سکتے ہیں۔
اس سے قبل موجود ماڈل جی پی ٹی-5.2 انسٹنٹ تین ماہ تک پیڈ صارفین کے لیے لیگیسی ماڈلز سیکشن میں دستیاب رہے گا اور 3 جون 2026 کو اسے باضابطہ طور پر ریٹائر کر دیا جائے گا۔
