فرانسیسی وزیرِ خارجہ جین نویل بارو نے فیصلے کا اعلان کرتے ہوئے کہا کہ یہ اقدام غزہ جانے والے فلوٹیلا کے ارکان کے ساتھ روا رکھے گئے سلوک پر عالمی سطح پر بڑھتے ہوئے غصے کی عکاسی کرتا ہے۔

فرانسیسی وزیرِ خارجہ نے سماجی رابطے کی ویب سائٹ ایکس پر اپنے بیان میں لکھا کہ آج سے اتمر بن گویر کے فرانسیسی سرزمین میں داخلے پر پابندی عائد کر دی گئی ہے۔

انہوں نے مزید کہا کہ وہ اپنے اطالوی ہم منصب کے ساتھ مل کر یورپی یونین سے بھی اتمر بن گویر کے خلاف پابندیاں عائد کرنے کا مطالبہ کر رہے ہیں۔

غیر ملکی خبر رساں ایجنسی کے مطابق مغربی حکومتوں کی جانب سے اس وقت شدید ردعمل سامنے آیا جب اتمر بن گویر نے ایک ویڈیو جاری کی، جس میں انہوں نے غزہ جانے والے فلوٹیلا کے کارکنان کا مذاق اڑایا۔ بعد ازاں بعض کارکنان نے الزام عائد کیا کہ حراست کے دوران ان پر جسمانی تشدد بھی کیا گیا۔