ایرانی میڈیا کے مطابق قطری وفد مذاکراتی عمل کو آگے بڑھانے اور حالیہ سفارتی پیش رفت پر تبادلہ خیال کے لیے ایران کا دورہ کر رہا ہے۔

ایرانی خبر رساں ایجنسی آئی ایس این اے کے مطابق اس وفد کی قیادت قطر کے وزیرِ اعظم اور وزیرِ خارجہ شیخ محمد بن عبدالرحمن بن جاسم آل ثانی کے مشیر کر رہے ہیں۔

رپورٹس کے مطابق وفد کا مقصد ایران اور امریکا کے درمیان حالیہ مذاکرات کے بعد پیدا ہونے والی صورتحال کا جائزہ لینا اور سفارتی عمل کو مزید آگے بڑھانے کے امکانات پر بات چیت کرنا ہے۔

ایرانی میڈیا کا کہنا ہے کہ یہ دورہ گزشتہ ہفتے ہونے والے مذاکرات کے تسلسل میں کیا جا رہا ہے۔ قطر طویل عرصے سے ایران اور امریکا کے درمیان ایک اہم ثالثی کردار ادا کرتا رہا ہے اور دونوں ممالک کے درمیان رابطوں کے لیے ایک مؤثر سفارتی پل سمجھا جاتا ہے۔

ایرانی خبر رساں ادارے تسنیم کے مطابق قطری وفد اپنے دورے کے دوران مذاکراتی عمل سے متعلق تازہ ترین پیش رفت، ممکنہ معاہدوں اور مستقبل کے سفارتی اقدامات پر ایرانی حکام سے تبادلہ خیال کرے گا۔

تجزیہ کاروں کے مطابق قطر کے اس دورے کو خطے میں کشیدگی کم کرنے اور ایران و امریکا کے درمیان ممکنہ مفاہمت کی جانب ایک اہم پیش رفت کے طور پر دیکھا جا رہا ہے۔