برطانوی نشریاتی ادارے بی بی سی کے مطابق مقبوضہ جموں و کشمیر کے لیفٹیننٹ گورنر منوج سنہا نے ہلاکتوں کی تصدیق کرتے ہوئے گہرے دکھ اور افسوس کا اظہار کیا اور اسے قومی نقصان قرار دیا۔

انڈین فوج کی وائٹ نائٹ کور نے سماجی رابطے کی ویب سائٹ ایکس پر جاری بیان میں کہا کہ آپریشن کے لیے جانے والی فوجی گاڑی خراب موسم کے دوران ایک نہایت دشوار گزار پہاڑی راستے سے گزر رہی تھی کہ اچانک سڑک سے پھسل کر گہری کھائی میں جا گری۔

بیان کے مطابق زخمی فوجیوں کو ہیلی کاپٹروں کے ذریعے قریبی اسپتالوں میں منتقل کیا گیا ہے۔

انڈین فوج کے مطابق یہ حادثہ کشمیر اور انڈیا کی شمالی ریاست ہماچل پردیش کی سرحد کے قریب پیش آیا۔ بلند پہاڑی علاقوں میں واقع فوجی ٹھکانوں تک رسائی کے لیے اسی شاہراہ کو استعمال کیا جاتا ہے۔

یاد رہے کہ ڈوڈہ کے پڑوسی ضلع کشتواڑ میں گزشتہ کئی روز سے مسلح عسکریت پسندوں کی موجودگی کے خلاف سیکیورٹی فورسز کا آپریشن جاری ہے۔

چند روز قبل عسکریت پسندوں نے محاصرہ کرنے والی فوجی ٹیم پر فائرنگ کی تھی، جس کے نتیجے میں پولیس کے اسپیشل آپریشنز گروپ کا ایک اہلکار ہلاک ہو گیا تھا۔

فوج کا کہنا ہے کہ حملہ آور گھنے جنگلات اور دشوار گزار پہاڑی درّوں کا فائدہ اٹھاتے ہوئے فرار ہونے میں کامیاب ہو گئے، تاہم ان کی تلاش کے لیے بڑے پیمانے پر آپریشن جاری ہے۔