لیاقت بلوچ نے بتایا کہ حکومت اور جماعت اسلامی کے درمیان مذاکرات کے بعد ممکنہ معاہدے کا مسودہ اس وقت حکومتی سطح پر زیر غور ہے. مذاکرات کے آئندہ دور میں اس مسودے اور جماعت اسلامی کے مطالبات پر بات چیت ہوگی، جس کے بعد کسی حتمی پیش رفت کی توقع کی جا رہی ہے۔
نائب امیر جماعت اسلامی نے امید ظاہر کی کہ وزیراعظم شہباز شریف اور نائب وزیراعظم اسحاق ڈار عوام کو ریلیف فراہم کرنے کی جدوجہد کو سنجیدگی سے آگے بڑھائیں گے اور مذاکرات کے ذریعے عام شہریوں کو درپیش معاشی مشکلات کم کرنے کے لیے عملی اقدامات کیے جائیں گے۔
لیاقت بلوچ کا کہنا تھا کہ جماعت اسلامی کی کوشش ہے کہ غریب اور متوسط طبقے کو مہنگائی، بھاری اخراجات اور معاشی دباؤ سے نجات دلانے کے لیے مؤثر اقدامات کیے جائیں۔ ان کے مطابق عوام کو ریلیف فراہم کرنا محض وعدوں تک محدود نہیں رہنا چاہیے بلکہ اس حوالے سے واضح اور قابل عمل فیصلے کیے جانے چاہئیں۔
انہوں نے واضح کیا کہ جماعت اسلامی عوامی حقوق کے تحفظ اور معاشی ریلیف کے مطالبات سے دستبردار نہیں ہوگی۔ حکومت کے ساتھ مذاکرات کے ساتھ احتجاج کا راستہ بھی برقرار رکھا جائے گا تاکہ غریب اور متوسط طبقے کے مسائل حکمرانوں کی توجہ کا مرکز رہیں۔
لیاقت بلوچ نے کہا کہ جماعت اسلامی مذاکرات اور عوامی احتجاج دونوں ذرائع سے اپنے مطالبات منوانے اور شہریوں کو ریلیف دلانے کی جدوجہد جاری رکھے گی۔ انہوں نے توقع ظاہر کی کہ 19 نومبر کو ہونے والا مذاکرات کا آخری دور مثبت نتائج کا باعث بنے گا اور حکومت عوامی مشکلات کے حل کے لیے سنجیدہ پیش رفت کرے گی۔







