حال ہی میں راکھی ساونت نے برطانوی نشریاتی ادارے بی بی سی کو انٹرویو دیا، جس میں انہوں نے پاکستانی مداحوں کے ساتھ اپنے تعلق اور ان کی جانب سے ملنے والی محبت کے بارے میں گفتگو کرتے ہوئے اپنے جذبات پر قابو نہ رکھ سکیں۔
پاکستانی مداحوں کے حوالے سے بات کرتے ہوئے راکھی ساونت نے کہا کہ پاکستانی مجھے بہت زیادہ محبت دیتے ہیں۔ جب بھی میرے ساتھ کوئی مسئلہ پیش آتا ہے تو پاکستانی سب سے پہلے میری مدد کے لیے پہنچتے ہیں۔
انہوں نے بتایا کہ دبئی میں رہتے ہوئے جب بعض اوقات مجھے بخار ہوتا ہے تو بھارت سے کوئی میری مدد کے لیے نہیں آتا، لیکن پاکستانی مداح مجھے اسپتال لے جانے اور میری دیکھ بھال کے لیے پہنچ جاتے ہیں۔
راکھی کا کہنا تھا کہ جن لوگوں کے والدین نہیں ہوتے، وہ دوسروں کی مدد اور محبت کے سہارے زندگی گزارتے ہیں، اور پاکستانی مداح بھی مشکل وقت میں میرا خیال رکھتے ہیں۔ میں جانتی ہوں کہ پاکستان اور بھارت ایک دوسرے کو دشمن سمجھتے ہیں، تاہم جو حقیقت ہے، وہ حقیقت ہے اور پاکستانی مجھے بہت محبت دیتے ہیں۔
