نجی خبررساں ادارے دی ایکسپریس ٹریبون کے مطابق لائیو سٹریمنگ میں ری جے کو بندوق لوڈ کرتے اور یہ کہتے ہوئے دکھایا گیا کہ وہ کسی کو گھر میں داخل ہونے سے روکنے کے لیے اسے استعمال کرے گا۔ سٹریمنگ کے دوران چیخ و پکار، بچوں کے رونے کی آواز اور پولیس سائرن بھی سنائی دی، لیکن اچانک براڈکاسٹ ختم ہو گیا۔
پرنسس لوو نے واقعے پر بات کرتے ہوئے الکحل کے حوالے سے ری جے کے الزامات کو مسترد کر دیا۔ انہوں نے کہا کہ میں اسے یہ موقع نہیں دوں گی کہ معاملہ مجھ پر یا میرے نشے کی حالت پر منتقل ہو۔ ایسا کچھ نہیں تھا۔
پرنسس کے مطابق ری جے نے تقریباً ایک ماہ تک اپنے بچوں سے رابطہ نہیں کیا تھا، جس پر انہوں نے بچوں کو اپنے ساتھ لے جا کر ری جے کے گھر لے جانے کا فیصلہ کیا، جب کہ وہ تھینکس گیونگ کا کھانا تیار کر رہی تھیں۔
انہوں نے یہ بھی کہا کہ انہوں نے ری جے کو واضح کر دیا تھا کہ کسی بھی قسم کے تنازع کی صورت میں وہ بچوں کے ساتھ گھر چھوڑ دیں گی۔
دوسری جانب ری جے نے پرنسس کے بیان کو مسترد کرتے ہوئے کہا کہ پرنسس نے رات دیر گئے بچوں کو لینے کی کوشش کی، اور ان کے مطابق اس وقت سب نے شراب پی رکھی تھی۔
انہوں نے الزام لگایا کہ ایک شخص ان کے بیڈروم میں داخل ہوا اور سوتے بچوں کو لے جانے کی کوشش کی، جس پر انہوں نے دفاعی ردعمل دکھایا۔ انہوں نے خود پولیس کو بلایا اور کہا کہ وہ اپنے خاندان اور گھر کی حفاظت کر رہے تھے۔
لائیو سٹریمنگ ری جے کے یہ بیان کے ساتھ شروع ہوئی کہ یہ دنیا کا سب سے خراب تھینکس گیونگ ہے۔ پولیس نے مزید تفصیلات جاری نہیں کیں اور معاملہ تفتیش کے دائرے میں ہے۔
