لاہور میں میڈیا سے گفتگو کرتے ہوئے عطاء اللہ تارڑ کا کہنا تھا کہ مسلم لیگ نون عوامی خدمت اور ترقیاتی کاموں کے حوالے سے ہر سطح پر سرگرم ہے۔ والٹن حلقہ ہمیشہ سے مسلم لیگ نون کا مضبوط گڑھ رہا ہے اور آج بھی ہم اس حلقے کی خدمت کے لیے ترقیاتی منصوبوں کا آغاز کر رہے ہیں۔
انہوں نے کہا کہ تعمیر و ترقی کا سفر مسلم لیگ نون کے منشور کا حصہ ہے اور تمام عوامی نمائندگان کے ساتھ مل کر عوامی فلاح کے کام جاری ہیں۔
وزیر اطلاعات نے بلوچستان میں حالیہ دہشت گردانہ حملوں پر روشنی ڈالی اور پاک فوج، پولیس اور بلوچستان حکومت کو خراج تحسین پیش کیا۔
انہوں نے کہا کہ دہشت گردوں نے صوبے کے مختلف علاقوں میں تباہی مچانے کی کوشش کی، مگر سیکیورٹی فورسز کی بروقت کارروائی کے باعث 80 سے زائد دہشت گرد ہلاک ہوئے اور بلوچستان بڑے نقصان سے بچ گیا۔
عطا تارڑ نے انڈیا کی جانب سے دہشت گرد تنظیموں کی پشت پناہی پر بھی زور دیا اور کہا کہ انڈیا کے ایجنڈے کے تحت پاکستان پر پراکسی حملے کیے جا رہے ہیں۔
انہوں نے واضح کیا کہ پاک فوج ہمیشہ دشمن کے منصوبوں کو ناکام بنانے میں پیش پیش رہی ہے اور دہشت گردوں کے خلاف مؤثر کارروائی کرتی ہے۔
وزیر اطلاعات نے کے پی حکومت پر بھی شدید تنقید کی اور کہا کہ وہاں عوامی خدمت کے معاملات میں شدید غفلت ہے۔ اربوں روپے کے فنڈز کے باوجود سی ٹی ڈی، سیف سٹی کیمرے اور فرنٹک لیب کے منصوبے مکمل نہیں ہوئے اور عوام بنیادی سہولیات سے محروم ہیں۔
یہ بھی پڑھیں: سکیورٹی فورسز نے 40 گھنٹوں کے دوران 145 دہشتگرد ہلاک کیے، وزیراعلیٰ بلوچستان
انہوں نے کہا کہ کے پی میں عوامی تحفظ، صحت اور تعلیم کی فراہمی کے لیے حکومت مکمل طور پر ناکام رہی ہے۔ کے پی حکومت کا کام صرف احتجاج کرنا اور اڈیالہ جیل کے باہر بیٹھ کر بےتکی باتیں کرنا ہے، عوام کی خدمت کرنا نہیں۔
عطا تارڑ نے کہا کہ جب عوام کو پروٹیکشن یا ریلیف کی ضرورت پڑتی ہے تو پاک فوج ان کی مدد کے لیے پیش آتی ہے، جب کہ حکومت غائب رہتی ہے۔
عطا تارڑ نے کہا کہ والٹن حلقے میں جاری ترقیاتی منصوبے مسلم لیگ نون کی عوامی خدمت کے عزم کا عملی مظاہرہ ہیں۔ انہوں نے مزید بتایا کہ عوامی سہولیات کی فراہمی، ریلیف کیمپوں کا انتظام اور ترقیاتی منصوبوں کی نگرانی وزیراعظم محمد شہباز شریف کی قیادت میں کی جا رہی ہے۔
وزیر اطلاعات نے بانی پی ٹی آئی کے طبی پروسیجر پر بات کرتے ہوئے کہا کہ علاج مکمل شفافیت اور طبی ہدایات کے مطابق کیا گیا اور اب وہ مکمل صحت یاب ہیں، صحت کے شعبے میں بھی سیاست نہیں کی جاتی اور عوام کی خدمت ہمیشہ اولین ترجیح رہی ہے۔
